Ubutumwa Minisitiri Bizimana yageneye Intore z’Indangamirwa, icyiciro cya 16
Ubutumwa Minisitiri w’Ubumwe n’inshingano Mboneragihugu, Dr Jean Damascene Bizimana yageneye Intore z’Indangamirwa, icyiciro cya 16, ku munsi wabo wo gusoza iminsi 40 bamaze batorezwa mu kigo cya gisirikare cya Gabiro.
10 KANAMA 2026: INDANGAMIRWA 769 MUSHOJE ITORERO, ICYICIRO CYA 16 MU KIGO CYA GABIRO, OYE! OYE! OYEEEEEEEEEEE!
Ijabo riduhe ijambo.
Mwarakoze cyane kwitabira Itorero no kurikora neza.
Ababyeyi banyu barakoze kubohereza gutozwa ubutore.
Abatoza banyu n’ababitayeho bose umunsi ku munsi, mu nshingano zitandukanye ariko zuzuzanya, barakoze ku bwitange bwabo ntagereranywa bwatumye mutozwa uko bikwiye, mugubwa neza isegonda ku yindi, none mutashye muri INDANGAMIRWA Z’IMBANGUKANABIGWI, muri INGABO ZIGENDA IMBERE Y’IZINDI. Tuzahora tubavuga ibigwi.
NTORE Z’ABAKOBWA murangije Itorero muri 315. Mwerekanye ko muri ABARI BATARUSHWA. Iteka na hose ndabifuriza kuzahora muri:
- Abadasumbwa n’Abadasumbanya
- Abadacogora n’Abadahinyuka
- Abadatezuka n’Abataruhuka
- Abatarushwa n’Abatarutwa
- Abatiganda n’Abanyamurava
- Abihuje n’Abashyirahamwe
- Abaticumugambi n’Abatigaya
- Indashyikirwa n’Indatsimburwa
- Inkumburwa n’Inyangagusumbwa
- Inyamamare n’Inyamibwa
- Ihogoza n’Icyeza
- Juru ry’inyange na Juru ry’umucyo
- Mudacogora na Mudahogora
- Mutarutwa na Sumbabandi.
NTORE Z’ABASORE murangije Itorero muri 454. Mwabaye ba RUGERO RW’ISHYAKA, AMASONGA ADASUMBWA. Mbifurije guhora muri :
- Mbanzimihigo na Mbanzamumahina
- Mudatsindwa na Muvuduko
- Mudahinyuka na Mutiganda
- Nganji na Ngabidatsimburwa
- Ngabibasumba na Ngabidatsindwa
- Nkerakubarusha na Nkerayumugambi
- Nyiribakwe na Nyirishema
- Ntabwoba na Ntamakemwa
- Rubaduka na Rubimburirangabo
- Rudahigwa na Rudakangwa
- Rudahangarwa na Rudacogora
- Rudahosha na Rudahusha
- Rudahindwa na Rudatinya
- Ruzirabwoba na Rugwizakurinda
- Rutikanga na Rutavogerwa
- Rwizihirakubarusha na Rwizihirwahakomeye.
NTIMUZADOHOKE KU BUTORE
Muramenye ko kizira kwitwa Ndimubanzi, Ndereyehe, Ndimukaga, Ndihebye, Nduhirabandi, Nkiriyehe, Ntahondi, Ntamabyariro, Ntahontuye, Ntabuhungiro, Ntamakiriro, Maburanturo, Mpungirehe, Mbayuwande, Mbuzamahwemo, Miruho, Hakizabera, Nkezabera, Nyakatsi, n’izindi nyito zo kwiheba zajyanye n’igihe cyahise kitakirangwa iwacu i Rwanda.
URWIBUTSO
Muzahore muzirikana umunsi w’indakemwa mwagize kuwa 28 Nyakanga 2026, ubwo Intore irizusha intambwe, Umutoza w’ikirenga, Nyakubahwa Perezida wa Repuburika, yaje kubasura, akabaha impanuro z’icyizere. Ntimuzamutenguhe.
Nimutahane ubupfura n’ubutwari.
Muzahorane amahoro n’amahirwe.
Muzimane u Rwanda.
Ibindi ubundi.
