Ku Mulindi w’Intwari: Dutemberane ahantu handikiwe amateka yo kubohora u Rwanda
Ku wa gatatu, tariki ya 15 Nyakanga 2026, twasuye Ingoro y’Amateka y’Urugamba rwo Kubohora u Rwanda ku Mulindi w’Intwari, iherereye mu Karere ka Gicumbi. Aha ni ho Ubuyobozi Bukuru bw’Inkotanyi bwakoreye igihe kirekire mu gihe cy’urugamba. Ni ho hakorerwaga inama zitegura imishyikirano ya Arusha. Ni ho hategurirwaga amabwiriza y’urugamba rwa gisirikare n’urwa Politiki. Ni ho hafatiwe ibyemezo bikomeye byahinduye amateka y’u Rwanda.
Mulindi w’Intwari iherereye mu Murenge wa Kaniga, mu birometero bigera kuri 80 uvuye mu Mujyi wa Kigali. Ukurikira umuhanda Kigali–Gatuna werekeza ku mupaka wa Uganda, maze wagera ahazwi nka Maya ugakata iburyo. Ni ku ruganda rw’icyayi rwa Mulindi, hagati y’imisozi myiza irebana, irimo umusozi wa Ngondore, ahantu haberanye no kuyobora neza urugamba, kuko ni no hagati y’ingabo zarwaniraga mu birunga, n’ingabo zwarwaniraga mu bice by’Umutara.
Kuvuga iyi ngoro si ukuvuga inyubako zisanzwe. Ni ahantu habaye icyicaro gikuru (High Command) cy’urugamba rwo kubohora igihugu hagati ya 1990 na 1994. Aha ni ho habaga abayobozi bakuru ba RPF Inkotanyi n’icy’Iigabo za RPA. Ni ahantu hafatiwe ibyemezo by’ingenzi byaganishije ku ntsinzi y’urugamba no guhagarika Jenoside yakorewe Abatutsi.
Mu gihe cy’urugamba, Mulindi yari ihuriro ry’ubuyobozi bwa politiki n’ubwa gisirikare. Perezida wa RPF Inkotanyi icyo gihe, Alexis Kanyarengwe, ni ho yakoreraga inshingano, kimwe n’Umugaba Mukuru w’Ingabo za RPA icyo gihe, Majoro Paul Kagame, waje kuzamurwa ku ipeti rya Jenerali Majoro. Ni aha kandi hakorerwaga igenamigambi rya buri munsi, inama z’ubuyobozi ndetse no gutegura ibikorwa by’ingenzi bya gisirikare.
Uyu munsi, Mulindi w’Intwari yagizwe Ingoro y’Amateka y’Urugamba rwo Kubohora u Rwanda, ifitwe mu nshingano n’Inteko y’Umuco, ibarizwa muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE).
AHANTU NDANGAMATEKA HASURWA
Unzu Umuyobozi wa RPF yabagamo
Duhereye aho umuyobozi mukuru wa RPF yari atuye. Iyi nzu yabagamo umuyobozi mukuru wa RPF kandi agakoreramo inshingano ze, mugihe ubuyobozi bwa RPF n’ubwa RPA bwatangiriye gukorera hamwe ku nshuro ya mbere mu buyobozi bumwe no gufatira hamwe ibyemezo.
Dusure aho Umugaba Mukuru w’Ingabo yari atuye
Habanza inyubako yakoreshwaga n’umugaba mukuru w’ingabo za RPA, Jenerali Majoro Paul Kagame mu gihe cy’urugamba rwo kubohora URwanda, kandi muri iki gihe ibungabunga umurage icyerecyezo n’ubwitange n’indangagaciro byagize uruhare rukomeye mu rugamba rwo kubohora u Rwanda.
Indake ikozwe nk’inyuguti ya “L”
Iyi ndake yakoreshwaga n’umugaba mukuru, mu bwirinzi, itumanaho rikagenda neza, ndetse n’igenamigambi rigakorwa mu mutekano mu gihe cy’urugamba rwo kubohora u Rwanda.
Aho bakiriraga abashyitsi hamwe n’indaki yo gutangiramo amabwiriza
Inyubako
Iyi nzu yabagamo abashinzwe kwakira abashyitsi, bahuzaga abashyitsi n’imirimo y’ubuyobozi, bagafasha mu itumanaho , imikorere inoze no kubahiriza amabwiriza mu gihe cy’urugamba rwo kwibohora.
Indi ndaki
Iyi ndaki yafashaga mu guhuza ibikorwa mu mutekano hagati y’ubuyobozi bukuru n’imitwe y’ingabo mu gihe cy’urugamba, kandi igaragaza uruhare rukomeye rw’itumanaho mu gutsinda urugamba rwo kubohora u Rwanda.
Inzu ADC yabagamo
Iyi nzu yabagamo Aide-de-Camp (ADC), wafashaga ubuyobozi bukuru mu guhuza gahunda, itumanaho n’umutekano mu gihe cy’urugamba rwo kubohora u Rwanda, bigaragaza akamaro k’izi nshingano mu mikorere inoze.
Inzu yitiriwe Arusha
Iyi nzu yakoreshwaga n’abagize ubuyobozi bukuru hamwe n’abanyapolitiki b’umuryango RPF mu guhuza ibikorwa no gufata ingamba ku byaberaga mu biganiro by’ amasezerano y’amahoro y’ Arusha, binyuze mu gusangira amakuru no gusuzuma ingamba.
Inzu abagore n’abakobwa babagamo
Iyi nzu yabagamo abagize ishami ry’abagore bagize uruhare urukomeye mu buyobozi, gukangurira abantu kwitabira urugamba, imiyoborere, ibikoresho n’inkunga yahabwaga abaturage mu gihe cy’urugamba.
Icyumba cy’inama
Iki cyumba cy’inama cyari ahantu h’ingenzi abayobozi b’umuryango RPF n’ingabo za RPA bahurizaga ingamba, ibikorwa bya gisirikare, n’ibyemezo bikomeye byagize akamaro mu gihe cy’urugamba.
Ikibuga cya Tennis
Iki kibuga cya tennis cyari cyaragenewe umugaba mukuru w’Ingabo kugira ngo ahakorere imyitozo ngororamubiri bikamufasha kuruhuka mu gihe cy’urugamba. Cyaramufashaga kubona umwanya wo gukora siporo no gutekereza, bigaragaza akamaro k’imibereho myiza mu buyobozi.
Ikibuga cya Basketball
Iki kibuga cya basketball cyakoreshwaga nk’ahantu ho kwidagadurira , harimo n’imikino ya gicuti yakinwaga n’intumwa z’urubyiruko z’amashyaka ya politiki, nk’urubyiruko rwa PSD, bikagaraza ibiganiro n’ubusabane mu gihe cy’urugamba rwo kubohora u Rwanda.
Ikibuga cya Football
Iki kibuga cy’umupira w’amaguru cyari ahantu h’ingenzi hakorerwaga ibikorwa byinshi mu gihe cy’urugamba, aho hatangiwe amapeti ya mbere yemewe ku basirikare ba RPA, havukira ikipe ya RPA Football Club, hanatangirwa amabwiriza kuri Batayo ya 3 mbere yo kujya i Kigali. Kuri iki kibuga ni ho havukiye ikipe ya APR FC.
Radio Muhabura, ijwi ry’urugamba
Iyi Radiyo yakoreraga ahitaruye inyubako zabanje. Aha ho ntitwashoboye kuhasura. Tubasezeranyije ko nitwongera kuhasura tuzabaha amakuru y’aha hantu hagize uruhare rukomeye mu kugeza ubutumwa ku ngabo no ku Banyarwanda muri rusange.
